හංස විලා - ජවනිකා අංක එක

ස්ථානය: මිදුල

මව මල් පැලයකට පෝර දමයි... හංසි සෙමින් අසලට පැමිනෙයි...

හංසි : අම්මේ... 

අම්මා : මොකද?

හංසි: මං ගස් ඔක්කොටම වතුර දැම්මා...

අම්මා: හුම්

හංසි: අම්මේ..

(ඇගිල්ලෙන් බිම හාර හාර ඇඹරෙයි )

අම්මා: ඇයි?

හංසි: අරයා කිව්වා හෝමාගමට අලුත් ෆිල්ම් එකක් ඇවිත් තියෙනවා කියලා... අපි දෙන්නා ෆිල්ම් එක බලන්ඩ ගිහින් එන්නද?

අම්මා : මොන ෆිල්ම් ද මේ වයසට... මිනිස්සු හිනස්සන්නේ නැතුව මෙන්න මේ ගෙදරට වෙලා ඉදපන්... අයියා වගේ පැලයක් හිටෝපන්..

හංසි: අනේ අම්මේ...

අම්මා: අනේ බනේ නෙවෙයි... රවුන් ගහන වයසක්ද මේක... ගෙදර මෙච්චර වැඩ තියෙද්දි රවුන් ගහලා පුළුවන් ද

(හංසි මූන දික් කරගෙන තාත්තාට ලං වෙයි..)

හංසි: තාත්තේ... අපි යන්නද

තාත්තා: උඹලගේ අම්මා කියන එකක් තමයි...

(නිවසේ සිටින පියාගේ තනිකඩ අක්කා පැමිනෙයි)

නැන්දා: මොකද මල්ලි මේ කුටු කුටුව?

අම්මා: මේ ලමයා ජොඩු දාලා ෆිල්ම් බලන්ඩ යන්ඩ අහනවා අක්කේ...

නැන්දා: හප්පොච්චියේ...(කම්මුලට අත තබාගනියි)

හංසි: ඉතින් මං වැරදි ගමනක් යන්ඩ ඇහුවේ නෑනේ..

නැන්දා: මේ පරම්පරාවේ ගෑනු කවුරුවත් ඔහොම ගමන් ගිහින් නෑ... හොද නම තියාගෙන හිටියා... රටේ එකෙක්ට පද හදන්ඩ බැරිවෙන්ඩ... අපේ හබරකඩ වල⁣වේ අත්තම්මා හිටියා නම්.... උන්දැගේ පපුව පැලෙනවා මේවා අහලා....

(පියා අහල පහල කවුරුන් සිටිදැයි වටපිට බලයි...)

නැන්දා: මල්ලිලා හොදයි දරුවෝ හදලා තියෙන විදිය!

අම්මා: මේ ලමයා තමයි අක්කේ මේ හිතුවක්කාර.. ලොකු ලමයා නම් අපි කියන දේකට පිටින් යන්නේ නෑ...

හංසි: ඔක්කෝටම හොද අයියා විතරයි..මං තමයි නරක...

(ආත්තම්මා මිදුලට පැමිනෙයි)

ආත්තම්මා: මොකද මොකද මේ සද්දේ... මට අරහෙට ඇහුනා...

නැන්දා: අම්මේ මේ බලන්ඩකෝ... මේ හංසි චිත්‍රපටි බලන්ඩ යන්ඩ හදනවා අර හලාවත ළමයා එක්ක...

ආත්තම්මා: හෑ.... මොන විලිසං ගේ  නැති වැඩක් ද ඒක.. මේ වයසේ ගැනු දරුවෝ ඒ වගේ වලත්ත ගමන් යනවද

හංසි: එහෙම නරක ගමනක් නෙවෙයි.. හෝමාගමට යන්නේ..

ආත්තම්මා: පෙනෙද මේකි හැදිලා තියෙන විදිය... වැඩිහිටියෝ දැනමුතුකම් දෙනකොට උත්තර බදින්ඩ එනවා...

(මව පියා සියල්ල ම හංසිට ඔරවයි...)

ආත්තම්මා: මේ ලගට වරෙන් උඹට මේවා කියලා දෙන්ඩ.. 

(හංසි ඇඩුම් සිරකරගෙන ආත්තම්මාට ලං වෙයි..)

ආච්චි: හංසියෝ... පිරිමි ජාතිය හෙනට සටකපටයි... උන්ට හැමතිස්සේම මදන විසේ..... 

(පියා පිට ව යයි)

ආත්තම්මා: අපේ කාලේ ගෑනු බොහෝම පරිස්සමින් හිටියේ.. උඹලාගේ සීයා එක්ක වුනත් එහෙම මෙහෙ ගියේ නැ මං... ගියත් ඈතින් ගියේ...

අනික චිත්‍රපටි සල්පිල්  වලට ගියාම ගෑනු දරුවන්ට කරදර වෙනවා... ඕකා යන ගමන් ඇගට ගොඩ වෙන්ඩ බලන්නේ.. උඹේ කසාද මිනිහා කියලා ඕකට වැඩිය අතපත ගාන්ඩ ඉඩ දෙන්ඩ එපා... ඔය ජවුසන් නැටිල්ල අමතක කරලා මෙන්න මෙහෙට වෙලා මට ඇහෙන්ඩ බුත්සරණ පත්තරේ කියවපන්!

හංසි: හරි හරි අපි කාමරේට වෙලා ඉන්නම්...

කළු රත්තරන් කියන්නේ ඉල්ලමක්

තෙල් කියන්නේ පොල්තෙල් වලට නෙවෙයි. තෙල් කියන්නේ පෙට්‍රල් නැත්තම් අලුත් ජාතියේ ආයෝජන අවස්ථාවකට. කළු රත්තරන් වලට  මෙච්චර වටිනාකමක් කවදාවත් තිබිලා නෑ. මීට අවුරුදු  2-3ට කලින් ෂෙඩ් එකක් ගාවින් යනකොට මතක් වෙන / කල්පනා කරන විකාර දේවල් තමයි කොච්චර ලොකු ටැංකි මේ පොලව යට ඇද්ද..  ඒව කවදා ඉවරවෙයිද.. සුද්ද කරන්නේ කොහොමද.. වගේ සාමාන්‍ය මෝඩ ප්‍රස්න ... ඒ වුනාට දැන් අපි හිතන්නේ...නෑ වැරදුනා..දැන් අපි හිතන්නේ නෑ... දැන් අපි දන්නවා ෂෙඩ් ගැන සෑහෙන්ඩ දේවල්. තෙල් එන බවුසරෙක කැපැසිටි එකේ ඉදන් ගමේ ෂෙඩ් එකේ ඩීසල් ටැංකිය පෙට්‍රල් ටැංකිය කොයි එකද,  වේ⁣ගෙන් ම තෙල් වදින පොම්පේ මොකක්ද, තෙල් බාන්ඩ යන වෙලාව, ඇත්තටම ෂෙඩ් එක අයිති කාටද, සමූහ ව්‍යාපාර කියන්නේ මොනාද වගේ අතිශ්‍යය කාලීන තෙල්මය දැනුමින් අපි හැමෝම මාර විදියට අප්ඩේට්.

කොරොනා වලින් පස්සේ ගෙදර ඉදන් වැඩ කරන්ඩ පුළුවන් ෆීල්ඩ් එකක ජොබ් එකක් කරන නිසා හැමදාම බයික් එකේ කොළඹ යන එක නැවතුනා. ඒත් ලේසියට බයික් එකේ යන ගමන් අඩුවුනේ නෑ... ඉතින් මෙච්චර දරුණු තෙල් අර්බුදේ ලොකුවට දැනෙන්ඩ ගත්තේ ලගම යාළුවෙක්ට බයික් එක දෙන්ඩ වුනාට පස්සේ... ලීටර් 5ක විතර ටැංකියක් තියෙන ස්කූටියක් පදින ඌ සතියට දෙපාරක් විතර තෙල් ගහන්නේ ඌගේ රස්සාව ම සයිට් වලට යන එක නිසා... අරන් පලයන් කියන පුරුද්ද වෙනුවට තෙල් බලලා ගනින් කියන්ඩ උනේ මගදි නතර වුනාම තල්ලු කරන්ඩ යන්ඩ වෙන නිසා...

පැය 10ක් බයික් පෝලිමක ඉදලා රු.2500ක තෙල් ගහගෙන ගෙදර ඇවිත් සතියක් යද්දි  යාළුවා එකෙනුත් ටිකක් අරන් ගියා.. කිලෝමීටරයක් විතර දිග පෝලිමක දවස් 2ක් තිස්සේ ඇවිත් ෂෙඩ් එක ලගට ආවම තෙල් ඉවර වෙන්නේ අපේ කාලකණ්නිකමට වඩා ගමේ පෝලිමේ හයිය වැඩි නිසා... අන්තිමට මුල් 20ට ඇවිත් නතර වුන නිසා බයික් එතන එහෙමම තියෙද්දි මාරුවෙන් මාරුවට පෝලිමේ හිටියා... දවස් 6ට පස්සේ ටෝකන් එකක් දීලා ⁣ඔය ළමයි ගෙදර යන්ඩ කිව්ව දවසේ ඉදන් ආයේ පෝලිමට ගියේ නෑ. කරන්ට් එකයි ඉන්ටර්නෙට් එකයි තියෙනකොට වැඩ කරන්ඩ පුළුවන් නිසා ගැටළුවක් නැතිවුනත් මිනිස්සු  7-8 දෙනෙක් ට රස්සා දෙන නිසා යාළුවා කොහොමහරි ගිහින් තිබ්බේ ලීටරයක් 2500ගානේ අරන්.

 අලුතින් ම ආපු QR Code එකෙන් සලාක ක්‍රමයට තෙල්දෙන එක වෙලාවේ හැටියට මාර වටින දෙයක්.... හැමෝටම පොඩ්ඩක් හරි හමුබුවෙන වනම් ඒක සහනයක්. තෙල් ගහන්ඩ කලින් ස්කෑන් කරලා ඒ ප්‍රමානෙට තෙල් ගහන සිස්ටම් එකට කැමති නැති, ඒකෙන් කෙල වෙන කට්ටිය ගොඩක් ඉන්නවා..

වැඩි ගානට විකුනන අය වගේම බූලි වලට පුරවන අයටත් මේක කරදරයක්.. හැදීගෙන ආපු ඒ මජර සංස්කෘතිය මෙකෙන් ඉවර වෙන්ඩ කියලා ප්‍රාර්ථනා කරමු.

මේ අදින්නා දානා තෙල් භූතයෝ ටික අයින් කරගන්ඩ බැරි වුනොත් අන්තිමට අපිට කරන්ඩ වෙන්නේ දේශානුරාගේ ලීටරේකට සංස්කෘතියෙන් මිලිලීටර් 50ක් වගේ දාලා වාහන පදින්ඩ.